Tradita shqiptare e ka dashur gjithmonë që tryeza e shtëpisë të mbante gjithmonë në mesin e saj shishen e rakisë. Por vitet kaluan dhe miqtë e mirë tashmë nderohen me verë të mirë. Kështu shprehet Altin Driza, djali i verës “Faba”, të cilën ai e quan poezia e tokës.
Kantina “Faba” u themelua në vitin 2004 si një kantinë familjare nga z. Faik Driza, me qëllimin e vetëm për t’i shtuar shijen tryezës familjare”. Por shumë shpejt, ambiciet e tejkaluan tryezën familjare, duke e hedhur verën “Faba” në treg për gjithë tryezat famijare shqiptare. Brenda një kohe të shkurtër, Kantina “Faba” arriti të përcjellë në tregun shqiptar të verërave emocionin e papërshkueshëm të një historie të re, atë të transformimit të lëngut të rrushit në verë cilësore.
Pasioni dhe dashuria u bënë bashkë dhe krijuan moton e Kantinës “Faba”: “Të prodhojmë vetëm verë cilësore, shija dhe luksi janë ekskluzive”. Prodhimi i verës “Faba” vjen në tavolinën tradicionale shqiptare si art dhe si shkencë, si një përzjerje e krijimtarisë individuale të Altinit dhe teknologjisë inovative në kantinë.
Që në kontaktin e parë, Altini të përcjellë pasionin dhe tërë dashurinë e tij për verën, nga mënyra sesi flet për të, nga dëshira për të treguar të gjithë kantinën dhe investimet e bëra në të, llojet e verërave “Faba”, fuçitë e lisit ku ruan si thesare dhe me nikoqirllëk verërat më të mira, ku sipas tij shkëlqen me gjithë magjinë e shijes vera “Kabërnelo”.
“
Të prodhosh verë nuk është njëllojë si të ngresh pallate që ndërtohen dhe shiten, e që këtu shkëputen lidhjet. Vera është shpirt, është shpirti i futur në një shishe vere, është gjallesë, lidhjet me të cilën janë afatgjata, me vite të tëra, aty në fuçitë e lisit, teksa ajo ruhet dhe stazhonohet për t’u bërë super verë. Thuhet se që të dalë verë e mirë, duhet të jesh njeri i mirë, pasi shpirti i tij duhet të futet në shishe.
“
Kantina Faba, teknologjia dhe kultivarët shqiptarë.
Sot, përsosmëria e Kantinës “Faba” kalon përmes investimit të fjalës së fundit të teknologjisë së prodhimit të verërave. Altini tregon se në kantinë ka bërë investime afatgjata me fjalën e fundit të teknologjisë së macerimit dhe fermentimit të lëngut të rrushit. Vjetërimi në fuçi lisi i verërave të kuqe të viteve më të mira, ka bërë të mundur krijimin e një game super cilësore.
- Kantina Faba numron 9 etiketa vere dhe 3 etiketa rakie.
- Kultivarët që përbëjnë sot verën “Faba” janë sheshi i zi, kabërnet sauvignon, merlot, san giovese, chardonnay, riesling dhe vlosh.
- Faba disponon 20 ha vreshta, të cilave u shërbehet me shumë përkushtim, dashuri dhe pasion. Pjesa më e madhe e vreshtarisë, dominohet nga Kabernet sauvignon, merlot dhe san giovese.
- Dy ha prej tyre i ka vresht të varietetit shqiptar “Shesh i Zi” dhe 8 dynym vresht “Vlosh” në zonën e Cakranit, vendosur në kodra me pozicione dominuese në raport me diellin.
- Por për Altinin, Sheshi i Bardhë dhe Vloshi mbetet ndër varietetet më të mira shqiptare. “Nëse fermentimi bëhet në temperaturën e duhur, vilet në momentin e duhur, do të sillnim një verë një verë shumë aromatike”.
- Prodhimi vjetor i Kantinës shkon deri në 1000 kv, ndërsa kapaciteti prodhues është 3000 kv.
- Në kantinë ndodhen rreth 300 000 shishe, ku përfshihen dhe rezerva.
Vera “Kabërnelo”, e bërë me rrush “Sangiovese” dhe “Kabërnet”, e vjetëruar për 24 muaj në fuçi druri, mbetet një nga verërat më të mira të Kantinës “Faba”.
Altini sot është një ndër prodhuesit e mirënjohur të verërave në vend. Por ambiciet e tij nuk përfundojnë këtu. Ndër synimet më të afërta të Kantinës “Faba” është kthimi i saj në një pikë agroturistike. Një qendër pritëse që do të hapë dyert për çdo turistë që hyn në qytetin e Fierit, duke iu ofruar atyre një infrastrukturë të dedikuar turistike, për degustimin e të gjitha llojeve e verërave të saj, vizitë në hapësirat e mëdha të kantinëspër të parë nga afër proçesin e fermentimit të lëngut të rrushit dhe vjeterimit e saj në fuçi lisi si dhe guida turistike nëpër vreshtat e kantinës “Faba”.